CEBU, Philippines - Patay ang usa ka drayber sa habal- habal human kini pusila sa wala hiilhing kriminal didto sa sitio Ibabaw, barangay Perrelos, siyudad sa Carcar niadtong Lunes sa alas 9:00 sa gabii. Ang biktima mao si Jovanie Espinosa, 34, minyo, nga taga sitio Catugasan, barangay Perrelos ug dugay nang nagmaneho og habal-habal.
Si SPO3 Jorame Tanodtanod sa Carcar City Police Station mibutyag sa Banat News nga ang biktima gikang namasahero ug mopauli na unta sa ilang balay aron mopahuway.
Apan samtang nagpadagan sa iyang motorsiklo, pag-abot sa lugar nga nahitaboan may nag-atang diay kaniyang tawo nga wala hiilhi ug gipusil siya niini sa makadaghang higayon hinungdan nga nabulit ang iyang lawas sa mga samad sa bala. Human mahagba sa karsada ang biktima nga naglunang sa iyang dugo gibiyaan kini sa kriminal kinsa maoy gipangita karon sa kapolisan.
Sa pagkakaron gisuta sa kapolisan ang hinungdan sa pagpusil niini ug kinsa usab ang matumbok nga kriminal. (BANAT NEWS)