'Nagsuyop' sud sa hotel nadakpan pag-usab

CEBU, Philippines -  Sa ikaduhang higayon nadakpan na usab og balik sa kapulisan ang anak sa operator og taxi kaniadto ug ning higayona gipasanginlang nanghagis sa iyang gi-check-inan nga hotel niadtong Sabado sa gabii diha sa dalan Sanciangko ning dakbayan sa Sugbu ug giingong nakuhaan og shabu ug mga drug paraphernalia.

Ang nadakpan giilang si Avelino Rosal, taga Nivel Hills sa barangay Lahug kinsa nakuhaan og duha ka putos sa gidudahang shabu, laing pito nga putos nga wala nay sulod ug kwarta nga kapin sa P5 mil. Si PO1 Meonik Cabañero sakop sa Mobile Patrol Group nga maoy nakadakop kang Rosal nga nahinabi sa Banat News nagkanayon nga gipara sila sa supervisor sa Sogo Hotel ug nangayo og tabang kay nanghagis sulod sa room ang usa nila ka guest.

Sa dihang ilang giadto ug mipaila sa ilang kaugalingong sila mga polis, matud ni Cabañero giingnan hinuon sila sa suspek og: “Ngano man diay og pulis mo? Pulis man sad ko, military ko.”

Sunod niini ang gituohang paglabay og bangko diha sa sulod sa maong lawak nga nadunggan nila sa gawas sa pultahan hinungdan nga gipugos pag-abli sa hotel staff ang lawak.

Pagkaabli niini sumala pang Cabañero nakuratan si Rosal ug gilabay ang gikuptang drug paraphernalia.

“Nagunit og foil ug tooter iyang gilabay, nagpasad gud sa salog, nay empty nga pito ka putos ug duha nga wala pa makuhai nga shabu ug kwarta kapin P5 mil cash, murag high kaayo sa drugas,” sumala pa ni Cabañero.

Kahinumduman si Rosal nadakpan sa mga pulis sa milabay’ng mga semana nga mi-checkin sa Queensland Hotel human gireklamo sa mga roomboy nga nanghagis, nakuhaan usab siya niadtong tungora og mga drug paraphernalia ug napasakaan og kaso apan nakapiyansa.

Matud ni Cabañero laing ipasaka nga kaso kang Rosal mao ang kalapasan sa section 11 ug 12 sa Republic Act (RA) 9165, damage to property ug disobedience in person of authority. (BANATNEWS)