CEBU, Philippines - Ang mga molupyo sa lungsod sa Carmen gipasabot pag-ayo bahin sa dakong kaayohan nga maangkon nila kun ikapatuman ang proyekto nga gitawag nga Cebu Bulk Water Supply Project.
Ang maong proyekto gitambayayongan sa pagpatuman sa kagamhanan sa lalawigan ug sa lungsod sa Carmen.
Si Gobernador Gwendolyn Garcia nagkanayon nga pinaagi sa maong proyekto, mapahimuslan sa taga Carmen ang kaabunda sa tubig nga mainom.
Sa miting nga gipatawag sa gobernador sa miaging adlaw mitambong ang presidente sa Manila Water Consortium (MWC) nga si Gerardo Ablaza, Jr., uban usab kang Cebu Vice Governor Agnes Magpale, Municipality of Carmen Mayor Gerard T. Villamor, 5th district Board Member Jude Durano ug VisCal Corporation Managing Director Margarette Gaisano Ang.
Sumala pa ni Mayor Villamor, daku kini og ikatabang sa ilang lungsod kay pinaagi niining Cebu Bulk Water Supply Project, masuplayan na ang probinsya sa Sugbo og limpyo ug luwas nga tubig. Gipanglantawan usab ni Villamor nga ang maong proyekto dako kaayo og ikatabang sa pagpalambo sa turismo sa Carmen.
Samtang si Ablaza, nagkanayon nga ang tibuok probinsya sa Sugbo nanginahanglan og P150 milyones ka litro nga tubig kada adlaw, apan dul-an ra sa 50 mil ka litro ang nasuplay niini matag adlaw sa pagkakaron.
Si Governor Garcia mapasalamaton kaayo sa kooperasyon ni Mayor Villamor sa nahisgutang proyekto.
Ang Cebu Bulk Water Supply Project usa ka proyekto nga gidumala ni Governor Garcia ug ni Mayor Villamor inabagan sa Manila Water Consortium, usa sa mga kompaniya sa Ayala Corporation. - (BANAT NEWS)