Heat stroke peligro sa tawo ug hayop

CEBU, Philippines - Ang kagamhanan sa lalawigan mipasidaan kagahapon sa mga mag-uuma nga ang heat stroke mugna sa hilabihang kainit sa panahon dili lamang makamatay   sa tawo kundi bisan sa kahayopan.

Ang maong pasidaan gihimo ni Provincial Veterinarian Dr. Mary Rose Vincoy kinsa mibati og kabalaka kalabot sa gibutyag   sa mga tinugyanan sa panahon nga ang labing taas nga temperature masinatian sa tanan sugod sa Mayo 1, ning tuiga.

Busa alang kang Vincoy gikinahanglang mabinantayon ang publiko niining kainit karon sa panahon aron dili masugamak sa heat stroke.

Sa samang higayon ang mga mag-uuma nga namuhi og hayop sama sa baka, kabaw, kabayo, kanding, manok, iro ug uban pa kinahanglang magbantay usab tungod kay may kinabuhi ang hayop sama sa tawo.  

Miingon si Vincoy nga kun mataguwam-an sa mga mag-uuma ang ilang kahayopan, peligro nga mangamatay kini   nga mopagan na usab unya sa presyo sa supply nga karne.

Sayo niini mipasidaan ang mga otoridad sa Philippine Atmospheric Geophysical amd Astronomical Services Adminsitration (PAGASA) nga ang kainit sa panahon labing mosilaob sugod sa Mayo 1, kay mopasulabi na sa maong higayon ang hangin nga amihan. Maoy hinungdan nga gipahinumdoman ni Vincoy ang mga naghayopan nga ibutang kanunay ang mga hayop sa landong nga lugar ug ang pagpainom kanila matag adlaw og daghang    tubig   maoy usa sa taming aron dili kaayo sila madutlan sa kainit sa adlaw.

Sama gihapon sa tawo nga matag adlaw giawhag sa Department of Health nga moinom gayud  og dili momenus 13 ka baso   aron dili   maughan ang ginhawaan .

Apan labaw sa tanan angay likayan ang pagbuwad pag-ayo sa init aron malikayan ang dakong disgrasya sa kinabuhi sumala ni Vincoy. (/WC)  (BANATNEWS)