CEBU, Philippines - Gimandoan sa Commission on Human Rights (CHR)-7 nga ipadali ang imbestigasyon pagsusi kun may nalapas sa katungod sa lima ka tinun-an sa Saint Theresa’s College (STC) High School Department nga wala tuguti nga makapaso atol sa nilabay’ng graduation niini niadtong Marso.
Si CHR-7 director Alejandro Alonzo mibutyag sa Banat News nga sentro sa ilang linaing imbestigasyon ang reklamo sa mga ginikanan nga oral defamation batok sa mga magtutudlo sa STC.
Ang CHR investigator nga si Lilibeth Llona maoy gitahasan sa paghimo sa imbestigasyon ug giangkon ni Llona dihang nahinabi sa Banat News nga nag-monitor sa dagan sa imbestigasyon ang ulohan nilang buhatan.
Ang mga ginikanan sa mga bata gihatagan sa CHR kutob sa katapusang bahin ning bulana pagbalik sa ilang buhatan aron kasugdan ang pormal nga pakisusi.
Posibleng ipatawag unya ang mga magtutudlo ug kadagkoan sa STC nga sentro sa gireklamo sa pagpadayon sa imbestigasyon.
Ang maong mga tinun-an mireklamo human wala tuguting makapaso sa ilang graduation rites bisan pa sa giisyu nga Temporary Restraining Order (TRO) sa korte human gi-insister sa STC nga nakalapas sa lagda sa tunghaan ang maong mga tinun-an tungod sa pag- upload og law-ay nila nga pictures sa Facebook nga gihulagway sa STC nga usa ka catholic school, sukwahi sa ilang gipangtudlo. (BANATNEWS)