CEBU, Philippines - Kritikal ang kahimtang sa 8- anyos nga batang lalaki human maliki ang ulo dihang nadasmagan sa sakyanan sa Land Bank of the Philippines sa sitio San Roque barangay Poblacion lungsod sa Alegria kagahapon sa alas 8:30 sa buntag. Ang biktima mao si Adrian Cardona ,8 , molupyo sa sitio Batching sa barangay Sta. Felomina sa maong lungsod.
Samtang ang nakadasmag niya mao ang Toyota Hi-lux nga kolor puti dunay plaka nga YGE-310 nga gipanag-iya sa LBP Carcar City Branch nga gimaneho ni Joseph Rayco Faciol , 35, nagpuyo sa sitio Mansanitas Tisa siyudad sa Sugbo.
Matud ni PO1 Efren Salvador sa Alegria Police Station dihang nahinabi sa Banat News naglakaw ang bata daplin sa karsada dihang mitabok kini ug wala makabantay nga dunay nagsunod sa armored van sa maong bangko nga pickup sa mao gihapong bangko.
Giingong maayong pagkalagpot sa biktima ug mitugpa sa sementadong dalan hinungdan nga gitabang kini ug gidala sa Reinhardt Wertgen Memorial Hospital sa lungsod apan tungod sa kapeligro sa kahimtang niini gibalhin kini og tambalanan sa Cebu City.
Ang drayber gitanggong sa karsel samtang ang manager sa bangko nga sakay sa maong pickup mao nay mipadayon sa ilang pagpanghatod sa pundo alang sa 4Ps Program sa gobiyerno ngadto sa Ginatilan. (BANATNEWS)