CEBU, Philippines - Wala makaapektar ang pag-usab-usab sa kahimtang sa panahon sa rehiyon ilabi na dinhi sa Sugbo nga maoy usa sa hinungdan nga daghan sa mga hayupan ang posibleng mataptan og sakit o ba kaha mangamatay nga mamahimong dili na kini mabaligya sa merkado.
Kini ang gipamahayag ni Romeo Capa, Regional Director sa National Meat Inspection Service-7 atol sa pakighinabi sa Banat News kagahapon pinaagi sa telepono.
Matud pa ni Capa nga maayo pa gihapon ang produksyon sa karne sa rehiyon tungod kay wala man silay nakuhang ilegal nga gipamaligyang karne tungod kay aduna man silay monitoring team nga gidestino sa matag merkado inubanan sa Local Government Unit ug City Veterinarians Inspector.
Dugang pa niya nga ila gayud nga gipaniguro nga ang matag dealer sa karne aduna gyud permit sa NMIS.
Ang hayop nga ihawon matud pang Capa kinahanglang mag-agi sa ante mortem examination o eksaminasyon sa dili pa ihawon ug post mortem examination isip katapusang inspeksyon sa karne niini ug kun luwas kining kan-on tatakan kini sa meat inspectors.
Sa pagkakaron wala pay nasakpang nagbaligya og double dead meat sa kamerkaduhan ilabi na niadtong mga hayop nga namatay tungod sa heat stroke apan gilapa ug gipamaligya sa merkado.
Ang temperatura sa Metro Cebu kagahapon 25 ngadto sa 36 degrees celsius nga matud pa usa sa labing init nga temperatura ning bulana. (BANATNEWS)