KSM Food Festival gibuksan

CEBU, Philippines - Pormal nang gibuksan sa publiko ang usa ka semanang Kadaugan Sa Mactan (KSM) “Food Festival” 2012 diin gipakita ang mga lamian ug mahalong pagkaon gikan sa mga dagkong hotel, resorts ug restaurants sa dakbayan sa Lapulapu apan sa barato nga presyo sugod kagahapon sa hapon.

Matud pa ni Lapulapu City Mayor Paz Radaza dako ang pasalamat niini ngadto sa mga hotels, restaurants ug resorts sa ilang pagsuporta sa usa ka semanang “Food Festival” isip usa sa mga kalihukan sa “Kadaugan Sa Mactan” o KSM.

Si Embler Mendoza ang manager sa Harold’s Hotel ug Chairman sa Tourism Commission sa dakbayan sa Lapulapu mipadayag nga pinaagi sa baratong presyo sa mga pagkaong sagad gitanyag sa mga hotels matilawan kini sa mga ordinaryong tawo nga kasagaran langyaw ug adunahan lang ang makakaon.

Gipaabot nga makatabang sa pagpalambo sa turismo ug sa ekonomiya sa siyudad ang KSM nga sundan sa Kadaugan Street Party hangtod Abril 28 isip pagsaulog sa kalampusan ni Datu Lapulapu batok sa Espanyol nga si Ferdinand Magellan nga buot mosakop sa isla sa Mactan 491 na ka tuig ang nakalabay sa kasaysayan. (BANAT NEWS)