Rama motabang gihapon

CEBU, Philippines - Si Mayor Michael Rama mipadayag nga andam gihapon siyang mosuporta sa thanks giving activity alang sa kanonisasyon ni Beato Pedro Calungsod sa hingpit nang pagka-santos niini karong Oktubre bisan pa man adto na kini buhaton sa dakbayan sa Mandaue.

“Hinuon nagdepende kana kay ato paman na ipa-check sa COA, kung unsa ang mga pamaagi nga puwede nato nga mabuhat,” sumala pa ni Rama.

Kahinumduman nga ang unang plano niini adto unta sa South Road Properties (SRP) gani nagsugod na ang siyudad sa pagpalimpiyo sa maong area.

Apan sa gipahigayon nga tigom sa mga kadagkoan sa Archdiocese of Cebu sa miaging adlaw nakahukom ang mga komitiba sa maong kalihukan nga adto nalang kini himuon sa dakong luna sa Mandaue City aron makaminos sa gasto.

Matud pa ni Paul Hubahib, ang representante ni Rama sa maong kalihukan base sa pagbanabana sa mga komitiba sa Archdiocese of Cebu giingong magkinahanglan og P100 milyones gastos kung anha sa SRP himuon ang kalihukan sanglit lapokon kaayo ang area busa kinahanglan butangan og lapad og lig-on nga salog.

Nasayran nga duna unta’y magtampo-tampo nga mga construction company alang sa maong kalihukan apan nangayo sila og tax credits.

Giklaro hinuon ni Hubahib nga hingpit na ang hukom sa komitiba nga adto na himuon sa Mandaue ang kalihukan sanglit duol kaayo kini sa mga dagkong establisamento ug daghan usab nga rota sa mga sakyanan. (BANAT NEWS)