CEBU, Philippines - Gibarogan ni Regional Trial Court Branch 10 Judge Soliver C. Peras ang desisyon sa pagkombikto ni Philippine Benevolent Missionaries Association (PBMA) Supreme Master Ruben C. Ecleo Jr. sa kasong Parricide tungod sa pagpatay sa asawang si Alona Bacolod.
Si Peras nga nahinabi sa mga tigbalita mipadayag nga dili lalim ang gihimo niya nga desisyon kabahin sa nahisgutang kaso ug gani dul-an duha ka buwan niyang gitun-an ang himuong desisyon.
“I have totally evaluated the evidences and the statements of the witnesses before coming up with the decision,” pasabot ni Peras. Matud usab ni Peras nga andam siya sa bisan unsang mga pagsuway o hulga nga iya unyang madawat tungod sa maong kaso apan kini nagpakita lang gyud nga patas ug makatarunganon ang hudikatura bisan si kinsa ug unsa pa ang estado sa kinabuhi sa mga nalambigit.
Tuod man, gibutyag usab ni Peras nga wala siya batia og kahadlok atol sa iyang pagdesisyon nga nakombikto si Ecleo kini tungod kay iya lang nga gihimo ug unsay insakto ug makataronganon.
“In every case, you will assume that there is a death threat,” pasabot pa ni Peras.
Kahinumduman nga niadtong milabay’ng Biyernes gihukman si Ecleo nga mabilanggo sulod sa 40 ngadto na sa 60 ka tuig tungod sa kasong parricide lakip usab niini mao ang iyang pagbayad og danyos nga nagkantidad og dul-an P26 milyones.
Samtang si Assistant Regional Director sa National Bureau of Investigation (NBI) Atty. Lauro Reyes mibutyag nga ila pang gipaabot ang official copy sa warrant of arrest ni Ecleo.
Andam usab ang buhatan sa NBI nga makig-alayon sa ubang mga law enforcers alang sa pagkasikop ni Ecleo. - Lesley Caminade-Vestil ug Conney M. Murro, NORSU (BANATNEWS)