CEBU, Philippines - Mokabat sa 12 ka mga balay nga ginama sa light materials ang naugdaw sa nahitabong sunog sa Basubas Compound, barangay Tipolo, dakbayan sa Mandaue alas 3:50 ang takna kagahapon sa hapon.
Ang kalayo nga nakontrol sa kabomberohan alas 4:13 ang takna sa kahaponon ug daling giisa ni Mandaue City Fire Marshall Rogelio Bongabong sa Task Force Alpha hinungdan sa pagtabang sa kabomberohan gikan sa dakbayan sa Sugbo, Filipino Chinese Volunteer Fire Brigade, Emergency Rescue Unit Foundation ug uban pa.
Si Bongabong miingon nga ang kahagip-ot sa dalan sa maong lugar hinungdan nga gisumpaysumpay na lang nila ang ilang mga hose.
Padayon pa ang imbestigasyon pagsuta sa hinungdan sa sunog nga swerteng walay naangol o kinabuhing nakalas.
Si Mayor Jonas Cortes miadto sa fire scene miingon nga ang biktima nga nawad-an sa ilang panimalay temporaryong ipahiluna sa mga tents samtang hatagan sila sa ilang nag-unang gikinahanglan sulod sa tulo ka adlaw.
Sa laing bahin, naugdaw ang duha ka balay sa sitio Tonggo, barangay Marigondon, dakbayan sa Lapu-Lapu niadtong Lunes sa gabii. Base sa report sa TV Patrol Central Visayas ang tag-iya sa balay nga naugdaw mao si Lilian Delos Santos diin ang tapad niining balay nga gipanag-iya ni Anecito Dejos naugdaw usab.
Lakip sa nasunog ang duha ka multicab ug usa ka motor nga gipanag-iya ni Delos Santos ug ang Tamaraw FX nga gipanag-iya ni Dejos.
Gibutyag ni Delos Santos nga nabiyaan sa iyang anak ang gidagkutan niining kandila.
Mikabat ngadto sa P500 mil ang danyos sa maong sunog. - Romeo Limpangog ug Brenda D. Batuto/EIM (BANATNEWS)