Mike ug Tomas nag-abot sa demolisyon

CEBU, Philippines - Nahimong tensyonado ang demolisyon kagahapon sa sitio San Miguel, Barangay Apas kagahapon sa buntag human 50 ka mga sakop sa demolition team mosugod na unta og guba sa mga panimalay sa 168 ka mga pamilya sa maong dapit.

Apan nabugnaw kini dihang gilibkas ang demolisyon tungod sa gipagawas nga temporary restraining order (TRO) gikan sa korte.

Mga personalidad sa siyudad sa Sugbo ang miadto kagahapon sa maong sitio kinsa pulos mihatag og moral support sa mga residente ug mitabang pa og hangyo kang Sherriff El Cid Caballes nga dili ihinayon ang demolisyon sanglit nangayo pa og temporary restraining order sa korte ang mga residente sa maong dapit.

Miuban sa mga residente sila si Mayor Michael Rama, Kongresista Tomas Osmeña, Konsehal Alvin Dizon, Konsehal Noel Wenceslao ug Konsehal Nida Cabrera.

Usa sa mga residente sa maong area nga si Marlyn dela Sala, ang misaysay nga 1961 pa sila nagpuyo sa maong area busa dili lalim kung basta-basta na lang kuhaon ang ilang gipuy-an.

Ang maong area nga dunay gidak-on nga 4.6 nga ektarya gipanag-iya ni Mariano Godinez kinsa padayon karon nga naninguha nga mahibalik ang iyang luna nga unang gigamit kaniadto isip Philippine National Police Regional Training School sa Central Visayas.

Una na nga gipahibalo sa mga residente nga dili gyud sila mohawa sa puwesto gumikan kay giila nga socialized housing site ang ilang giistaran sukad pa niadtong 1999 pinaagi sa gipasar nga resolution sa konseho sa siyudad sa Sugbo.

Samtang si Konsehal Dizon nakugang sa gibuhat ni Rama kagahapon gumikan kay samtang gikahinabi niya ang sherrif uban ni Osmeña, kalit lang miduol ang mayor sa ilang tapok ug kalit nga mihinabi sa sherrif ug matud pa niini nga siya ang angayan nga pakighinabian gumikan kay siya ang mayor.

Suma pa ni Dizon nga gipasagdan lang niya si Rama kinsa iyang gihulagway nga nabag-ohan lang sa maong sitwasyon.

Matud pa ni Dizon nga importante kaayo ang pagtinabangay karong panahona ug kinahanglan nga ipadaplin una ang politika.  (BANATNEWS)