CEBU, Philippines - Usa ka babaying adunay sakit sa pangisip ang gipahimuslan sa usa ka tricycle driver niadtong Sabado sa gabii diha sa sitio Lower Matumbo barangay Pusok syudad sa Lapu-lapu.
Ang biktima nagpangidaron og 40-anyos apan wala sa ensaktong pangisip samtang ang nasikop nga suspetsado mao si Antonio Pinote, 56, molupyo sa maong lugar. Sa pasiunang imbestigasyon nasayran gikan sa Women and Children Protection Desk Officer nga si PO1 Chona Amoren misaysay nga nianang pagka alas 7 sa miaging gabii, si Pinote nakakita sa biktima ug iya kini nga gisampit ug gipasulod sa ilang panimalay.
Tuod man, kay ang asawa wala man diha sa ilang panimalay si Pinote nakahigayon sa iyang yawan-ong hunahuna batok sa biktima ug gilugos kini.
Human sa hitabog ipapauli sa suspek ang biktima apan ang 38-anyos nga igsuon sa biktima nakakita pagdayon og gawas sa igsugon diha sa panimalay ni Pinote.
Dihang iyaha kining gisuna kung unsay gibuhat niini sa balay sa silingan wala’y kukahadlok ang biktima nga misulti ngadto sa iyang igsuon sa nahitabo kaniya.
Diha-diha dayun ang igsuon daling nangayo og panabang ngadto sa sub-station sa Pusok diin ang kapolisan dali usab dayon nga misikop sa suspetsado.
Ang biktima dali usab nga gidala sa pink room sa Vicente Sotto Medical Center alang sa eksaminasyon. - (BANAT NEWS)