Wanted nadakpan tungod sa Facebook

CEBU, Philippines - Gumikan sa Facebook account, usa ka lalaking nahimutang sa ikapitong wanted dinhi sa dakbayan sa Sugbu tungod sa kasong pagpanglugos sa usa ka menor de edad ang nasikop sa Criminal Investigation and Detection Group (CIDG)-7 sa miaging alas-5 sa hapon didto sa barangay Lahug sa lungsod sa Clarin Bohol.

Si Chief Insp. Fermin Armendares pangulo sa Criminal Investigation and Detection Team (CIDT) sa CIDG-7 nga nahinabi sa mga tigbalita miila sa suspek nga mao si Jerome Japson, 23, nga taga sitio Kahipa sa barangay Hipodromo ning dakbayan.

Ang pagkasikop ni Japson gibase sa Warrant of Arrest (WOA) nga giisyu niadtong Oktobre 5,2007 ni Judge Manuel Patalinghug sa Regional Trial Court (RTC) Branch 22 sa Cebu City tungod sa kasong pagpanglugos.

Ang korte mimando sa suspek nga makapiyansa og P25 mil. Giingong nahitabo ang pagpanglugos sa suspek ngadto sa 10-anyos niadtong Marso 6, 2007 diha sa ilang balay sa Hipodromo.

Matud ni Armendares milayas ug didto sa Ormoc City nagtago sulod sa dul-an tulo ka tuig ug mibalhin sa Siquijor og dul-an sa duha ka tuig ug dayon sa lungsod sa Liloan mga duha ka semana ug pagkahuman mibalhin sa Tagbilaran City sa Bohol ug ang katapusan didto sa Clarin, Bohol diin siya nagtrabaho sa usa ka hardware.

Si Armendares mibutyag nga ilang na-trace ang suspek pinaagi sa iyang Facebook account diin usa sa mga ‘friends’ niini ang ilang napangayoan og impormasyon.

Ang suspek dihang gikuhaan og reaksyon wala motingog ug igo lang milingo-lingo.

Ang 54-anyos nga inahan sa suspek nga nahinabi sa Banat News kagahapon mihimakak sa pasangil batok sa iyang anak.  - BANAT NEWS