Bata nalumos sa atabay

CEBU, Philippines - Patay ang kapin sa tuig pa nga batang lalake human kini mahagbong ug malumos sa atabay kagahapon sa alas 11:00 sa buntag diha sa sitio Cassiri, barangay Cansojong, dakbayan sa Talisay.

Ang nalumos mao si James Kyle Cabisas Saroda, usa ka tuig ug siyam ka buwan ang panuigon, residente sa maong dapit kinsa daling gidala sa iyang inahan nga si Rhea Saroda ngadto sa Talisay City District Hospital apan wala na kini makaabot nga buhi ngadto sa maong tambalanan.

Sila si SPO1 Mikie Espina ug PO2 Stephen Sefuesca ang daling miresponde sa maong hitabo mibutyag sa Banat News nga nagduwa ang bata ug mga ig-agaw diha sa gawas sa ilang balay dihang nahitabo ang aksidente.

Ang inahan sa bata matud pa ni Espina migawas sa ilang balay ug nanguha og mangga apan sa pagbalik niini wala na diha ang iyang anak ug mga kaduwa niining ig-agaw.

Sa tanto niyang pagpangita nakit-an niya kini sa atabay nga may gilawmong taga hawak sa hamtong nga tawo gibanabanang 50 metros gikan sa ilang balay apan naglutaw na kini ug miburot na ang tiyan.

Si Espina midugang nga walay nakabantay sa bata dihang mipaingon kini ngadto sa atabay. Nasuta nga sa wala pa manguha og mangga ang inahan sa bata gikan kini sa maong atabay nanglaba sa sayo pa.(/EIM) (BANATNEWS)