Pagpahigayon sa Traslacion giandam na

CEBU, Philippines — Gipangandaman na sa Traffic Enforcement Agency (TEAM) sa siyudad sa Mandaue ang traslacion sa Imahen ni Senior Sto. Nino nga ipahigayon karong Enero 17, 2025.

Ang traslacion manukad sa Basilica ug dad-on ang Imahen ni Senior Sto. Nino sa National Shrine of Saint Joseph sa siyudad sa Mandaue kauban sa Imahen sa Birhen sa Guadalupe.

Si Hylle Retuya, pangulo sa TEAM miingon nga sa maong adlaw hugtan nila sa pagbantay ang kadalanan pinaagi sa pagdistino og mga traffic enforcer nga mopatunhay sa kahapsay sa dagan sa mga sakyanan.

Ang Imahen ni Senior Sto. Nino pagasugaton nila ni Mandaue City Mayor Glenn Bercede ug mga opisyal sa siyudad diha sa may Innodata sa Barangay Subangdaku.

Dad-on kini sa National Shrine of Saint Joseph alang sa paghiusa sa Sagrada Pamilya ug tibuok gabii magtapok ang mga deboto alang sa pagbilar.

Sa kaadlawon sa Sabado Enero 18, 2025 ang Imahen ni Senior Sto. Nino dad-on sa National Shrine sa Birhen sa Regla sa Siyudad sa Lapu-Lapu alang sa Fluvial procession nga pagahimoon ug sa pagbalik na sa Basilica Minore Del Santo Nino sa siyudad sa Sugbo.

Sa laing bahin gitugutan gihapon sa mga opisyal sa barangay Santo Niño nga ibilin sa ilang barangay hall ang mga maleta o bagahe nga dagko nga bitbit sa mga debotos aron makasulod sila sa Basilica.

Matud ni kapitan Lourdes Ramirez nga ikatulo ka tuig na nila karon nga gitugtan ang pagbilin sa mga bagahe diha sa ilang barangay hall ilabi na niadtong mga deboto nga gikan sa lagyong dapit.

Dugang pa niya nga aduna silay gipatuman nga mga polisiya aron dili magkailis ang mga gamit nga ipangbilin sa mga deboto.  Rowena D. Capistrano, MEL BANAT NEWS