CEBU, Philippines - Patay dihadiha ang usa ka ginang ug naangol usab ang gipasanginlang ‘kabit’ niini dihang miulbo ang panaglalis sa magtiayon diha sa ilang balay sa Purok Dakit Uper Silot sa barangay Yati sa lungsod sa Liloan kagahapon sa alas 1:30 sa kaadlawon. Ang duha gidunggab ug gitigbas sa suspek.
Ang biktima nga patay dihadiha mao si Susan Iglesia, 41, minyo, nagpuyo sa maong lugar nakaangkon og daghang samad dinunggaban sa kalawasan human dunggaba sa bana nga si Ferdinand Iglesia, 42, nga drayber og habal habal.
Apil sa natigbasan sa suspek mao ang silingan sa magtiayon nga si Fidelito Gonzales nga gidudahan sa suspek karelasyon sa iyang asawa.
Matud ni SPO3 Ernesto Pepito sa Liloan Police Station dihang nahinabi sa Banat News ang ginang ug ang suspek nag-away sulod sa ilang kwarto tungod sa selos sa suspek sa iyang asawa nga nakig-relasyon sa ilang silingan nga minyo.
Sa tanto nilang panaglalis misangpot kini sa pagdunggab sa suspek ngadto sa asawa kinsa nakaangkon og tulo ka samad dinunggaban sa wala ug tuong bahin sa dughan ug sa tiyan.
Ang duha ka mga anak nga lalaki sa magtiayon nga nagpangidaron og 21 anyos ug 19-anyos nga nakamata sa komosyon daling misusi sa lawak sa ilang ginikanan ug naabtan nila nga naglunang na sa dugo ang ilang inahan.
Sumala pa sa kapolisan ang suspek daling migawas sa balay ug gisulong ang silingang si Gonzales dayong sulod sa balay niini ug mao na usab kini ang gitigbas ug miikyas.
Si Gonzales nga nakaangkon usab og samad tinigbasan sa lawas daling gidala sa tambalanan lahos dinhi sa dakbayan sa Sugbo ug sa paghimo ning balita padayon pang giatiman sa mga doktor.
Matud pa usab ni SPO2 Marcelino Servilla, imbestigador sa kapolisan sa maong lungsod nga subay sa nahipos nilang impormasyon kanunay na nga mag-away ang magtiayon tungod sa katahap sa bana nga ang iyang asawa ug si Gonzales adunay relasyon.
Dugang pa niya nga posibleng wala na makapugong sa iyang kaugalingon ang suspek hinungdan nga iyang nahimo ang krimen.
Matud pa ni Servilla gisirad-an unta ni Gonzales ug sa asawa niini ang ilang pultahan apan nakasulod gihapon ang suspek diha sa bintana ug dihadiha gihapsan og tigbas si Gonzales.
Ang kapulisan padayon pa sa ilang imbestigasyon ug man hunt operation sa nagtagotago nga suspek. - BANAT NEWS