CEBU, Philippines - Adto mag-Biyernes Santo sa sulod sa bilanggoan ang usa ka babaye nga nadakpan sa buy bust operation sa mga sakop sa Criminal Intelligence Bureau (CIB) sa Mandaue City Police Office (MCPO) ug nasakmitan kini og kapin sa 25 gramos nga shabu kagahapon sa gabii.
Si Superintendent Josefino Ligan nga maoy hepe sa CIB sa kapolisan sa maong dakbayan maoy nangulo sa buy bust operation nga gipahigayon sa barangay Camputhaw sa dakbayan sa Sugbo.
Matud pa ni Superintendent Ligan nga ilang nadawat ang kasayoran bahin sa ilegal nga patigayon sa maong dinakpan kay tig-supply usab diay kini og shabu sa pipila ka barangay sa Mandaue.
Busa gipanid-an dayon sa kapolisan ang suspetsado ug pinaagi sa usa ka police decoy, mao kini ang nakigsabot sa suspetsado nga mokompra og shabu .
Unya nagkasabot dayon sila nga adto sila magbinayranay sa usa ka lugar sa barangay Camputhaw sa dakbayan sa Sugbo.
Dihang nagkatagbo na sila didto gitunol dayon sa police decoy ang minarkahang salapi nga P500 ngadto sa suspetsado.
Human kini madawat gitunol usab dayon sa suspetsado ang usa ka pakete nga shabu ug diha-diha miduol dayon ang nagpahipi nga kapolisan dayong sikop sa maong babaye.
Human maposasi, gisiksik pa sa kapolisan ang palibot sa maong lugar diin nakapunit pa sila og dugang putos sa shabu nga mitimbang og 25 ka gramo nga nagkantidad og P150,000 ang street value niini. Ang nasikop nagkagulkol karon sa prisohan ug unya pa kini sa sunod semana kapasakai og kiha tungod kay Semana Santa man karon. - BANAT NEWS