CEBU, Philippines - Nagtingkagol sa detention cell sa Pardo Police Station ang usa ka lolo human gipasanginlang mimolestiya sa iyang silingan nga 8-anyos nga batang babaye sa miaging gabii diha sa usa sa mga barangay sa amihanang barangay sa dakbayan sa Sugbu.
Ang biktima nga tinun-an sa grade one mipasangil sa 63-anyos nga silingan (pangalan gipugngan aron taguon ang pagkatawo sa biktima) sa pagpanglugos sumala pa sa Womens Childrens and Protection Desk (WCPD) sa Pardo Police Station.
Matud pa sa imbestigasyon milakaw ang bata nianang gabhiuna maong gipapangita kini sa inahan sa 15-anyos niining anak apan mibalik dayon ang gisugo ug misumbong nga gimolestiya sa suspek ang iyang manghod diha sa balay niini.
Uban sa amahan ug inahan sa bata giadto nila ang balay sa suspek ug gisukmatan sa gibuhat niini dungan sa pagpugong nga di kini makaikyas samtang nagpaabot sila sa mga polis. Ang suspek nga nahinabi sa Banat News nangambot sa alegasyon kay matud pa niya nahibulong nalang siya nga gikalitan na siya og bunal sa iyang asawa dihang diha na sa iyang tupad ang bata. Matud niya wala gyud siyay kalibotan nga iyang gihilabtan ang bata sanglit hubog siya niadtong higayona. Ang suspek miangkon sad nga magtunolan siya’g kwarta sa bata.
“Ang asawa mismo sa suspek maoy misulti sa akong 15-anyos nga anak ipakuha ang manghod kay gihikap ang kinatawo sa bata,” sumala pa sa inahan dihang nahinabi sa Banat News kinsa midugang nga ikaduha na kining higayong gibuhat sa suspek sa iyang anak. Si SPO1 Leonora Ramas sa WCPD sa Pardo Police Station mitug-an nga ilang gipahiling ang bata ug nasutang nahilabtan gyud kini.
“Base sab sa among interview sa bata niingon man nga gipasok ang tudlo anang tawhana,” sumala pa ni Ramas.
Kasong rape in relation with Republic Act 7610 kon Child Abuse ang gikatakdang ipasaka batok sa maong tiguwang. EIM - (BANAT NEWS)