CEBU, Philippines - Usa ka bana nga nangulata sa iyang asawa gitigbas og pinuti sa iyang ugangan busa hapit mabalbag ang iyang ulo didto sa barangay Kolabtingon, lungsod sa Ginatilan kagahapon lapas sa tungang gabii.
Ang biktima nailhan nga si Leo Angana, hingkod, ug molupyo sa barangay Cantabong sa maong lungsod, samtang ang suspetsado nailhan usab nga si Jovencio Misa, 55, ugangan sa biktima ug silingan ra usab niini.
Sa pakighinabi sa Banat News ni SPO2 Florencio Clarion sa Ginatilan Police Station kini mibutyag nga ang asawa sa biktima miadto sa balay sa suspetsado nga iyang amahan.
Apan matud pa ni Clarion nga daan nag-away ang biktima ug ang asawa niini sa wala hisayring hinungdan sa wala pa kini moadto sa balay sa iyang amahan.
Busa ang biktima nga naglungot-lungot sa iyang asawa miapas niini ug didto sa balay sa iyang ugangan, gikulata niya ang iyang asawa.
Ang amahan nga wala makaantos sa iyang nakita nga pagdagmal sa iyang anak mihiwasa sa kasuko dayong lanit sa iyang pinuti ug gitigbas ang ulo sa biktima.
Maayo gani nga murag habulan og dyutay ang maong pinuti nga may gitas-ong 21 pulgadas busa wala mabalbag ang ulo sa biktima ug nabinlan kini og kinabuhi.
Ang suspetsado giingong diha-diha mitahan dayon sa iyang kaugalingon ngadto sa buhatan sa kapolisan human sa maong panghitabo.(WC)(BANAT NEWS)