Trike ug motorcycle lanes gisugyot

 CEBU, Philippines - Gisugyot ni 6th District Board Member Thadeo Ouano nga butangan og mga tricycle lanes ug motorcycle lanes ang mga dagkong kadalanan sa lalawigan sa Sugbu aron dili makulban og kaldero ang mga drayber nga nagsalig niini isip panginabuhian.

Kini nunot usab sa higpit nga implementasyon sa Land Transportation Office sa pagdili sa mga traysikol ug habalhabal nga makaagi sa mga national roads tungod sa kapeligro niini alang sa drayber ug mga pasahero niini.

Si Ouano nakakita hinuon og problema sa katumanan sa mga tricycle lanes tungod kay walay klarong kahugpungan ang mga drayber sa maong matang sa transportasyon.

Giawhag ni Ouano ang tanang mga operator ug drayber sa mga traysikol ug habalhabal pagporma og kaugalingong kahugpongan o organisasyon aron mausa ang ilang tingog ug mas daling madungog sa mga lokal nga opisyales sa ilang mga lugar.

Sumala pang Ouano daghang mga pamilya ang nagsalig sa maong matang sa panginabuhian ug karong hingpit nang giimplimentar ang maong polisiya sa LTO naapektahan usab ang panginabuhian sa maong mga drayber ingon man ang ilang mga pamilya.

Gawas sa mga pamilya sa maong mga drayber ug operator lakip sa dakong maapektahan ang mga sumasakay nga nagsalig lamang sa maong matang sa transportasyon.

Dugang pa ni Ouano, gawas sa kahugpongan mahimong ambisyunon sa mga drayber ug operator nga makalukat og insurance sa ilang panginabuhian aron makatabang sa mga drayber, operator ug sa mismong mga sumasakay.

Matud pang Ouano dili siya magpanuko pagtabang sa mga kahugpongan sa mga drayber sa maong matang sa transportasyon aron mopanday og ordinansa sa lalawigan kabahin sa ilang panginabuhian. (BANATNEWS)