AKRHO mamapas sa mga vandal

CEBU, Philippines - Patabangon na ang tanang mga sakop sa nagkalain-laing grupo sa fraternity sa pagpanglimpyo sa mga vandal kon hugaw nga sinuwat-suwat sa mga kadaplinan o kaha sa mga center island sa kadalanan niining dakbayan nga pangulohan sa Akrho.

Mao kini ang unang lakang nga nahunahunaan ni kanhi Dangerous Drugs Board (DDB) Undersecretary nga si manlalaban Paul Clarence Oaminal kinsa maoy gitudlo ni Mayor Michael Rama nga anti-vandalism czar. Pipila sa mga grupo sa fraternity nga pasalmoton ni Oaminal sa   trabaho sa pagpamapas sa mga vandal ning siyudad mao ang Alpha Kappa Rho (AKRHO).

Ang Akrho matud pa ni Oaminal maoy iyang itudlo nga mangulo sa grupo nga manghinlo ug lauman usab niya nga magkasandurot ang mga sakop sa nagkalainlaing fraternity group sa itahas kanilang trabaho.

Ang suliran bahin sa vandalismo dugay na kaayo nga wala masulbad ug daghan nang mga tawo nga nag-ugtas batok sa mga   tigpamandal.

Hinuon matud pa ni Oaminal nga dili lang dinhi sa dakbayan sa Sugbo ipatuman niya ang maong hiniusa nga pagpamapas sa mga suwat-suwat sa mga pader, poste, bongbong, center island ug hapit bisan asang suoka sa tibuok Sugbo.

Kay gihagit usab niya ang suporta sa publiko ilabina na sa pundok sa mga batan-on aron magmalampuson ang iyang mga plano nga sa makausa pa mahinlo ang tanang vandal ning siyudad.

Si Oaminal daan nang nailhan sa iyang ka-aktibo kaniadto sa kampanya batok sa gidiling drugas ilabina niadtong DDB Undersecretary pa kini.

Hinuon giangkon ni Oaminal nga dili siya magmalampuson bisan sa iyang paningkamot gawas kun may kooperasyon ang publiko.

Si Oaminal kinsa maoy consultant sa AKRHO nagkanayon nga dali ra niyang masugo ang maong grupo niining dakong tahas nga gipiyal kaniya sa kagamhanan ning dakbayan pinaagi ni Mayor Rama.(/WC) (BANATNEWS)