Pagpalansang sa krus sayop - Palma

CEBU, Philippines - Gisalikway ni Cebu Archbishop Jose Palma ang nabaniog nga pagpalansang pagbalik ni Gilbert Bargayo sa krus isip panaad sa nagsingabot nga Biyernes Santo sa Semana Santa.

Ang Arsobispo sa Sugbo nagkanayon nga dili siya mosuporta ug mo-endorsar sa maong matang sa kalihukan sa Semana Santa tungod kay alang kaniya dili kini ang hustong paagi sa pagpakita sa hugot nga pagtuo ngadto sa Ginoo.

 “Para nako di maayo nga magpalansang pareha ni Hesus,” matud pa ni Palma atol sa usa ka press conference kagahapon didto sa Archbishop Palace.

 “We cannot judge their motivation but this is not the proper way for identifying ourself to Jesus Christ,” matud pa niya. “We must focus on a more spiritual way.”

Girespeto ni Palma ang mga panaad sa mga magpalansang sama ni Bargayo, apan iyang giklaro nga dili kini makakuha og bisan gamay nga suporta gikan sa Simbahan. “We don’t encourage those kinds of practices like crucifixion.”

Si Bargayo nga upat ka tuig nang wala magpalansang sa krus panahon sa Biyernes Santo sa pakighinabi sa Banat News sulod ning semanaha mibutyag nga ang kitaon niya sa pagpalansang sa krus karong Biyernes Santo iyang ipatukod og kapilya sa ilang dapit sa dakbayan sa Carcar.

Wala hinuon maklaro kung ang pagpalansang sa krus ni Bargayo kabahin ba sa tinuig nga “Buhing Kalbaryo” nga gipasiugdahan sa siyudad nga magsugod sa San Nicolas Parish Church padulong sa Guadalupe Parish Church.

 Gipahimangnuan ni Palma ang mga Katoliko nga ang Semana Santa usa ka panahon alang sa pag-ampo uban sa pamilya ug dili ang gihimo sa uban nga miisip niini nga usa ka matang sa bakasyon.

 “Holy Week is not a vacation time. I hope everyone will participate in the activity of the Church,” awhag pa sa Arsobispo. (BANATNEWS)