CEBU, Philippines - Human sa upat ka tuig nga pagpahuway sa pagpalansang sa krus subay sa iyang panaad matag Semana Santa, mobalik na usab sa pagpalansang sa krus ang nabantog na nga si Gilbert Bargayo karung umaabot Biyernes Santo.
Sa pakighinabi sa Banat News ni Bargayo mibutyag kini nga gitanyagan kaniya ang barangay kapitan sa Duljo-Fatima sa dakbayan sa Sugbu nga si kapitan Elmer Abella nga mo-sponsor sa pagpalansang kaniya.
Tuod man, wala maglangay si Bargayo nga dawaton ang maong tanyag sa tinguha nga siya makapenetensya usab ug makapahimo usab og kapilya sa ilang dapit nga dugay na niya nga pangandoy.
Matud pa ni Bargayo nga dugay na siya nga nangandoy nga makapatukod og kapilya sa ilang dapit apan wala pa gyud kini matinuod kini bisan paman og aduna siyay nadawat nga mga amot gikan sa iyang pagpalansang kaniadto.
Gibasol niya kini ngadto sa ubang tawo nga mosakay usab sa iyang gihimo ug manawat og hinabang nga dili maabot sa iyang mga kamot.
Apan karon nga gipasaligan siya ni Abella ug Mayor Michael Rama nga motabang sa pagpatukod og kapilya sa ilang dapit sa Cogon sa siyudad sa Carcar malaumon siyang matuman na ang iyang pangandoy.
Kahinumduman nga niadtong tuig 2008 maoy kataposan nga pagpalansang sa krus ni Bargayo sa barangay Mantalongon sa lungsod sa Dalaguete. Apan naundang siya sa maong kalihukan tungod kay wala nay mikuha kaniya ug wala nay mi-sponsor.
Sulod sa 18 ka tuig nang nagpalansang si Bargayo sa krus isip iyang pamaagi sa pagpenetensya ug paghinulsol sa iyang mga sala. (BANATNEWS)