Oaminal mokuha'g suporta sa SK

CEBU, Philippines - Si manlalaban Clarence Paul Oaminal mibutyag nga sugdan na niya ang pagduol sa mga batan-on sa kabarangayan aron makatabang sa epektibo  niyang pagpatuman sa iyang katungdanan isip chairman sa anti-vandalism group ning siyudad. Si Oaminal kinsa bag-o lang gisangonan ni Mayor Michael Rama sa maong katungdanan nagkanayon nga unahon niya pagtigom ang mga lider sa Sanggunaing Kabataan(SK) sa matag barangay aron mao kini unang mopahimangno sa mga sakop sa SK sa ilang matag lugar   sa pagbantay sa mga grupo sa mga batan-on nga maghugaw-hugaw sa mga pader, poste, ug tanang kasuwat-suwatan nila og mga binuang nga pulong sa daplin sa kadalanan ning dakbayan.

Si Oaminal kinsa maoy kanhi undersecretary sa Dangerous Drugs Board nagkanayon nga unahon niya ang pag-edukar sa kabataan aron dili na kini mag-vandal.

Matud niya nga dako kaayo og papel ang SK sa matag barangay kay mao kini ang iyang giyahan aron mag-organisar og mga boluntaryong grupo ug task force brigade nga mohawan sa mga lugar nga gipanghugaw-hugawan.

Midugang siya nga kadtong mga tighugaw-hugaw o tig-vandal paapilon usab sa pagpamapas sa mga gisuwat-suwat sa mga bongbong, poste ug uban pang gi-vandalan aron malugda ilabi na kun ang mga kauban niya sa SK motabang sa pagbadlong kaniya.

Gipasabot ni Oaminal nga ang maong kalihukan mamintenar kun ma-edukar ang kabataan kinsa maoy tinubdan niining vandalismo.

Si Oaminal nagkanayon nga ang matag barangay kinahanglan nga butangan og mga art site alang sa mga kabataan nga gustong mag-drawing, mag-painting o magsuwat-suwat. Angayan usab nga ipasabot sa kabataan nga ang dakbayan sa Sugbo sama kini sa ilang panimalay diin sila magpuyo nga dili angayang hugaw-hugawan.

Ang suliran bahin sa vandalismo dugay na kaayo ug walay nakasanta niini dinhi sa dakbayan sa Sugbo gumikan sa kalisud hisakpan niining mga grupo nga tig-vandal.

Ang mga otoridad sa kapolisan ug sa kabarangayan nagtuo nga kasagaran sa mga kabataan nga tig-vandal mao kadtong mga tiggamit og gidiling drugas.

Ang uban kanila mga rugby boys ug sakop sa mga gang nga napasagdan sa mga ginikanan busa maglibud-suroy ug himoong kalingawan ang pag-vandal.

Gituohan usab nga may mga dagkong tawo sa ilang grupo nga maoy tig-supply og mga pintal nga i-spray nila sa mga pader, poste, center island ug bisan asang dapita nga imarka ang ilang ngalan o kaha ngalan sa grupo.

Si Oaminal nagkanayon nga kun wala man kini masanta sukad pa kaniadto, iyang paningkamotan nga niining iyang paglingkod karon sa katungdanan isip hepe sa anti-vandalism group mosaler ang iyang mga laraw. Apan daan na niyang giingon nga nagkinahanglan siya sa abag sa publiko kay dili kini mahimo kun siya lamang sa iyang kaugalingon. (BANAT NEWS)