CEBU, Philippines - Kakulang sa mga magbalantay sa kabukiran batok sa mga mamutol og kahoy ang gitumbok nga hinungdan sa grabeng pagsiaw sa maong ilegal nga kalihukan.
Aron mahunong na ang ilegal nga pagpamutol og mga kahoy diha sa sitio Campinsa, barangay Manipis, dakbayan sa Talisay nagkinahanglan nga magdugang og mga vanguard matud ni Konsehal Bernard Odilao, chairman sa committee on environment.
Ang nahisgutang lugar nga gikunsiderar sa gobiyerno nga timberland matud pa kinahanglang mabantayan nga dili maguba sa mga illegal loggers.
Gibutyag ni Odilao nga nakadawat siya og mga report nga duna pay nahitabong ilegal nga pagpamutol og mga kahoy diha sa Campinsa.
Ang mga Vanguard, job order employees kini sa city hall ug gidestino sa pagbantay diha sa sitio Campinsa aron masikop ang mga mamutolay og kahoy.
Apan matud ni Odilao nga ang mga vanguard mao ra poy bantayan sa mga badlungon.
Niining bag-o lang si Odilao mihangyo kang Mayor Socrates Fernandez nga magtukod gyud og vanguard ngadto sa Campinsa.
Ang Campinsa dunay gilay-ong 14 kilometros gikan sa national highway ug kung dunay report nga dunay namutol og mga kahoy sa maong dapit ang mga sakop sa vanguard sa barangay Lagtang pa ang moresponde.
Nasuta usab nga alas 5:00 sa hapon lang kutob ang pagbantay sa maong grupo apan ang mga pagpamutol og kahoy anha sa gabii molihok.
Ang modus sa mga illegal loggers kung walay makakita hinay-hinayan nila sa pagtipak ang punoan sa kahoy hangtud nga monipis kini ug matumba ug sa gabii na nila kuhaon ang kahoy nga natumba kung wala nay mga vanguard nga mag-roving.
Ang kasagarang gipang-abuso nga kahoy diha sa Campinsa mao ang Pine Tree diin hinay-hinayan og panit ang lawas niini aron ibaligya para haling. - BANAT NEWS