CEBU, Philippines - Nadasok sa usa ka panimalay ang firetruck sa lungsod sa San Fernando ug wala na makaresponde pa sa nahitabong sunog sa usa ka ancestral house kagahapon sa kaadlawon sa North Poblacion lungsod sa San Fernando.
Ang panimalay nga gipanag-iya ni Alice Narvios gilamoy sa kalayo ug hinuon luwas nga nakagawas ang mga namuyo niini sumala pa sa kabomberuhan.
Sa pakighinabi sa Banat News ni SFO1 Chino Zuasola sa San Fernando Fire Station, mibutyag kini nga nakontrolar nila ang maong sunog sulod sa singko minutos.
Giisa lang usab kini sa 1st alarm apan mikabat ang danyos ngadto sa P300 mil.
Matud pa ni Zuasola nagsugod ang kalayo sa duha ka andanang panimalay sa mga Narvios nga ginama sa mixed materials diha sa kwarto ni Ferdinand Narvios nga anak ni Alice.
Midugang usab si Zuasola nga base sa ilang nakuhang impormasyon adunay nadunggan ang mga silingan nga may mibutong suga sa maong balay una pa mikatap ang kalayo.
Tungod niini nagduda silang electrical misuse ang hinungdan sa maong sunog.
Samtang, ang municipal firetruck nga gimaniho ni Walter Estelloso wala makatabang human kini mabangga sa usa ka panimalay atbang sa ilang estasyonan. - BANAT NEWS