3 ka polis gireklamo og pagpangulata

CEBU, Philippines - Tulo ka mga polis sa Punta Princesa Police Station sa barangay Punta, dakbayan sa Sugbo gipasanginlang nangulata sa tulo ka tawong ilang gisikop tungod kay giingong kadudahan ang mga lihok niadtong Miyerkules sa gabii diha sa Lourdes Apartment, barangay Tisa, dakbayan sa Sugbo.

Ang mga polis nga gipasanginlan mao sila si PO3 Atilano Ferrolino, PO1 Alexis Alfares ug PO1 Romeo Ramos.

Ang mga mipasangil sa tulo mao sila si Roland Tesoro, 29, drayber og traysikol ug ang higala niining si Julie Labiaga, 23, parehong residente sa eskina sa dalan Tupas ug Tres de Abril, sa barangay Pahina Central, sa dakbayan sa Sugbo.

Si Tesoro ug Labiaga midangop aron mosumbong sa maong hitabo kagahapon sa buntag diha sa buhatan sa Investigation and Detection Management Branch (IDMB) sa Cebu City Police Office (CCPO).

Sa imbestigasyon sa IDMB nga ang duha giingong giteksan sa ilang higalang si Grace Lao, 29, nga paanhaon sa iyang apartment aron tabangan sa pagkuha sa iyang itoy nga namatay.

Si Tesoro ug Labiaga giingong naabot diha sa apartment mga alas 6:00 sa gabii niadtong Miyerkules ug nagdala sila og sako aron sudlan unta sa itoy nga namatay apan pag-abot sa duha wala diha sa iyang apartment si Lao tungod kay duna kini gitambongang graduation.

Si Tesoro ug Labiaga naghuwathuwat kang Lao diha sa gawas sa apartment nianang tungora dihang ang nahisgutang mga polis nga nagpatrolya misitar kanila tungod sa gidala nilang sako ug gidudahan sila niining mga kawatan, dihang miesplikar sila sa ilang tuyo wala sila pamatia sa tulo ug pugsanong gipasakay sa patrol car ug gidala sa Punta Princesa Police Station.

Sumala pa sa tulo gisulod sila ngadto sa interrogation room diin sila giingong gipangkulata sa nahisgutang mga polis dayon gisulod sila sa karsel sulod sa usa ka gabii ug usa ka adlaw hinungdan nga kagahapon lang sila nakapa-blotter sa hitabo.

Si Ferrolino kinsa maoy team leader sa grupo mihimakak sa mga pasangil batok kanila ug nagkanayon nga ilang gisikop si Tesoro ug Labiaga tungod kay kadudahan ang mga lihok ug gidetener nila kini tungod sa “vagrancy” o nagsuroy-suroy.

Si Inspector Jesus Arong sa IDMB nagkanayon nga mopahigayon sila og imbestigasyon sa hitabo ug posibleng ang tulo ka mga nahisgutang polis mag-atubang og kasong administratiba. (BANATNEWS)