CEBU, Philippines - Nagpasalamat si Mayor Michael Rama kang kanhi Senador John Sonny Osmeña gumikan sa padayag niini nga mas adto pa siya mopusta sa kasamtangang mayor itandi sa iyang ig-agaw nga si Kongresista Tomas Osmeña.
Matud pa sa mayor nga dako na kaayo og ikatabang ang mensahe sa kanhi senador gumikan kay nagpakita lang kini nga mapun-an ang iyang mga supporter.
Giklaro hinuon ni Rama nga wala pa siya’y pormal nga pakighinabi kang Sonny kinsa iyang gihulagway nga taud-taod na niya nga higala.
Kahinumdoman nga wala gihapon magtingog hangtud karon sila si Tomas ug Sonny sulod na sa pipila ka katuigan ug naandan na nga managlahi ang ilang baruganan matag eleksyon.
“Kaming Sonny dugay nami nga higala niana, maong nagpasalamat ko sa iyang gisulti,” matud pa ni Rama.
Dugang pa sa mayor nga bisan sa kadaghan na karon nga mga personalidad nga miproklamar na ngadto mosuporta kaniya , iyang gipasalig nga dili maapektohan ang iyang trabaho.
“Menusan gyud na nato ang politika, aron maka-concentrate ta sa atong trabaho,” matud pa ni Rama.(/WC) (BANATNEWS)