P8 na ang pletihan

CEBU, Philippines - Karong adlawa miumento na ang pletihan gikan sa P7.50 ngadto na sa 8 pesos human naaprobahan sa kadagkuan sa Land Transportation Franchising Regulatory Board (LTFRB) ang provisional fare increase kagahapong adlawa.

Sa pakighinabi sa Banat News ni LTFRB-7 Regional Director Ahmed Cuizon mibutyag kini nga kagahapon sa hapon gipadangat sa iyang buhatan sa nakab-ot nga desisyon sa ilang labaw kalabot sa umento sa pletihan.

Matud pa ni Cuizon nga pwede na karung adlawa makapatuman ang mga public utility vehicles (PUJ) sa maong umento apan gikinahanglan una silang mokuha og certification sa ilang buhatan.

Dugang pa ni Cuizon nga temporaryo lang ang maong umento ug aduna pa kini posibilidad nga makapatuman sa gipangayo gyud nga umento sa pletihan nga 1.50 pesos apan usa kini maaprobahan mopaubos una kini sa public hearing.

Pasabot pa ni Cuizon nga ang LTFRB makapatuman sa provisional fare increase bisan paman og walay ipahigayon nga public hearing.

“The LTFRB has the power to enforce the provisional increase bisan og walay public hearing,” pasabot pang Cuizon.

Butyag pa ni Cuizon nga ang miaprobar sa maong probisyon mao ang chairman nga si Atty. Jaime Jacob ug usa ka board member nga si Engr. Julius Garcia.

Samtang ang Sugboanong sakop sa board nga si Atty. Roel Iway misuway unta sa pagbabag sa maong desisyon tungod sa rason nga ang provisional fare increase di makiangayon ug di na kinahanglan.

Matud pa ni Iway ang mga nagpetisyon wala makapakita sa ilang financial statement ug ang gobiyerno padayun pa sa pag-implementar sa Pantawid Pasada Program. (BANAT NEWS)