Plano sa NPA di makapakurat

CEBU, Philippines - Ang plano sa New People’s Army (NPA) nga mohari na usab sa Bohol ug Cebu gihulagway sa military nga dili alarming ug dili makapakurat, sumala pa ni Lt. Col. Nolasco Mempin, ang hepe sa 78th Infantry Battalion sa Philippine Army.

Sumala ni Mempin nga walay laing tuyo ang mga NPA gawas sa pagsamok-samok sa kahusay ug kalinaw nga gipatunhay sa mga sakop sa Armed Forces of the Philippines (AFP) Central Command.

 Usa sa mga lungsod sa lalawigan sa Sugbo nga giplanohan sa NPA nga ilang yak-an mao ang San Remegio kay matud pa ni Mempin may mga estudyante nga nagpuyo sa maong lungsod nga na-recruit na sa League of Filipino Students (LFS).

Apan hugtanon kining gihimakak sa mga sakop sa LFS, kinsa mipasangil kang Mempin nga malisyoso og hunahuna kay alang kanila dili sila sakop sa mga komunistang rebelde dinhi sa nasud.

Si LFS-Visayas Liaison Officer JC Alejandro nagkanayon nga mga progressive group sila ug dili mga NPA.

Gawas sa San Remegio, ang lungsod sa Pinamungahan ug dakbayan sa Toledo mao usay rumbo sa maong mga rebelde.

Sa iyang bahin sa Lt. Col. Christopher Tampus, tigpamaba sa AFP- Central Command, gibutyag niini nga hugtanon nilang gipanid-an  karon ang mga mag-uuma ug mga mamumuo kinsa maoy unang daling malingla sa mga pasalig sa mga komunista.

Samtang nagpadayon usab ang ilang koordinasyon sa mga mayor ug mga barangay kapitan nga maoy ilang gisugo sa pagpaniid sa mga kalihokan sa mga konstituwente.

Si Sr. Supt. Patrocinio Comendador, hepe sa Cebu Provincial Police Office, miingon usab nga ang report bahin sa komunistang grupo dili   bag-o apan gihugtan nila ang pagpaniid sa palibot sa lalawigan. (BANATNEWS)