Radaza midepensang legal ang pagpanakop nila sa mga trak

CEBU, Philippines - Gipanghimakak ni Lapulapu City Mayor Paz Radaza nga iyang gituyo ang pagbabag ug pagpadakop sa mga dumptrucks nga nagdala og yuta alang sa Cordova reclamation projects nga moagi sa kadalanan sa dakbayan sa Lapulapu. Matud pa ni Radaza igo lamang niining gipatuman ang ordinansa sa truck ban nga giimplementar sukad pa niadtong tuig 2005 diin sa maong ordinansa adunay oras nga gitakda alang sa mga dagkong trucks nga makaagi sa ilang kadalanan.

Ang ordinansa nagmando nga sugod lang sa alas 6:00 ngadto sa alas 8:00 sa buntag ug sugod alas 4:00 ngadto sa alas-8:00 sa gabii lamang ang truck ban.

Gipasabot ni Radaza dili lamang ang mga trak nga nagkarga og filling materials ngadto sa Cordova ang ilang gipangdakop sanglit tanang trak nga nagkarga og mga construction materials nga moagi nianang mga orasa ang ilang dakpon.

Giingong sa maong mga oras bug-at kaayo ang bul-og sa trapiko sa dakbayan maong kung dunay mga trak makadugang kini sa problema dugangan pa nga tungod sa kabug-at sa ilang mga karga daling mangaguba ang kadalanan. (BANATNEWS)