CEBU, Philippines - Kandila nga wala mapalong maoy gituohang hinungdan sa lain na usab nga sunog nga mitumaw ug ning higayona nahitabo kini sa sitio Fatima Sudlon Lahug ning dakbayan.
Ang panimalay ni Tessie Mansalabi maoy gigikanan sunog nga nakakaon pa og duha ka panimalay.
Si Cebu City Fire Marshall Anderson Comar mibutyag sa diha nga nahinabi sa Banat News nga mikompisal kaniya si Mansalabi nga nangadye siya sa iyang kwarto ug human niya og pangadye iyang nabiyaan ang kandila nga nagsiga.
Pagduda ni Comar nga natumba ang kandila nga maoy hinungdan sa sunog.
Gibana bana ni Comar nga mokabat lang sa P50 mil ang danyos sa maong sunog.
Samtang sa laing bahin, padayon pang gipaubos sa imbestigasyon ang nahitabong sunog sa miaging adlaw diha sa Lucimba barangay Pardo.
Matud pa ni Comar nga wala pa sila makatipon sa ilang mga nakuhang impormasyon ug padayon pa usab silang naghipos og mga ebidensya aron masuta ang sinugdanan sa maong sunog.
Si Comar miingon nga ang mga napasong managsuon nga silang Ralph Lawrence ug Raymund Wayne Dolalla ug Justo Tagacanaw nakaangkon og 2nd degree burn.
Ang maong sunog mao nay ikatulo ning semanaha samtang ang dakbayan nag-obserbar sa Fire Prevention Month karong bulana. - BANAT NEWS