P9 nga pletihan sa jeepney?

CEBU, Philippines - Gipadayag sa kahugpungan sa jeepney drayber ug operator sa Sugbo ang ilang pormal nga pagsang-at og petisyon alang sa dugang P1.50 nga usbaw sa pletihan sa pampublikong sakyanan karung adlaw’ng Lunes sunod semana.

Ang chairman sa City Transport System Cooperative (Citrasco) Ryan Yu maoy mipadayag niini dihang nahinabi sa DyDD kagahapon. Giluwatan kining maong katin-awan ni Yu human usab gipadayag ni Land Transportation Franchising and Regulatory Board member Manuel Iway nga dili pa makapahimulos ang mga operator ug drayber sa Sugbo sa gitakdang aprobahan nga 50 sentimos nga provisional increase sa usbaw sa pletihan paghimo nang P8 sa minimum nga pletihan tungod kay hangtud karun wa pay pormal nga petisyon ang transport groups sa Sugbo nga naduso.

Dili na kini magdugay pa tungod kay matud pa ni Yu nga karun nang sunod semana nila iduso ang pormal nga petisyon apan buot nila nga P1.50 na ang usbaw aron mahimo nang P9 ang minimum nga pletihan.

Sumala pa niini nag-agwanta kanunay ang mga drayber sa ilang kinitaan nga diriyot nalang walay madala sa ilang balay tungod sa kamahal sa krudo ug gasolina ingon man ang mga spare parts.

Apan matod ni Yu gihangop hinuon nila ang pasalig sa ulohang buhatan sa LTFRB nga mohatag una og P.50 nga provisional increase samtang tukion pa ang petisyon nga P1.50 nga usbaw.  (BANATNEWS)