CEBU, Philippines - Gumikan sa pangabubho nagpakamatay ang usa ka ulitawo pinaagi sa paghikog gamit ang iyang bakus sulod sa ilang balay sa Purok Kapayas, barangay Canjulao, dakbayan sa Lapulapu sa milabay’ng gabii.
Si SPO1 Manolito Abella sa kapolisan sa homicide section sa Lapulapu City Police Office (LLCPO) miila sa namatay nga mao si Rolito Degamo, 29, adunay kapuyo nga babaye ug lumad nga molupyo sa maong dapit.
Matud pa ni SPO1 Abellanosa nga si Degamo wala nay panimuot nga nadiskobrehan sa iyang kapuyo kansang liog gibitik sa bakus nga nylon nga ang pikas tumoy gigaid niini sa sagbayan sa ilang balay.
Dali nilang gitangtang ang bakus gikan sa liog ni Degamo ug ila kining gihatod sa tambalanan apan gideklarar kini sa mga doktor nga dead on arrival. Dugang pa ni SPO1 Abellanosa nga ilang nasuta nga pangabubho ngadto sa kapuyo ang hinungdan sa paghikog ni Degamo
Si SPO1 Abellanosa miingon usab nga misuway na og hikog si Degamo pinaagi sa pag-ambak sa atabay apan naluwas kini sa mga silingan.
May higayon nga naglaslas usab kini sa bukton apan naluwas gihapon siya kay nadali pagdala ngadto sa doktor ug ang tanan naggumikan s a iyang pagselos sa iyang kapuyo.
Matud pa ni Abellanosa nga ang kapuyo ni Degamo may tulo ka anak ug ang amahan niini ila ra usab nga silingan hinungdan nga magpunay lang siya og paniid sa mga lihok sa iyang kaipon uban sa kanhi kapuyo usab niini.
Hinuon gisugyot gihapon sa kapolisan ngadto sa tagtungod ni Degamo sa pagpaubos niini sa autopsy aron masuta nga walay foul play ang iyang kamatayon. (BANATNEWS)