Samsam Gullas andam modagan pagka-kongresista

CEBU, Philippines - Ang apo ni Kongresista Eduardo Gullas sa unang lalawigan sa Sugbo nga si Gerald Anthony “Samsam”Gullas Jr. bukas nga modagan isip Kongresista puli sa iyang apohan kinsa naa na karon sa kataposang termino apan wala pay pinal nga hukom ang iyang pamilya.

Si Samsam kinsa nagpanuigon pa karon og 27-anyos nga nahinabi sa mga tigbalita kagahapon mibutyag nga gitun-an pa nila ang sitwasyon ug duna pa silay mga opsiyon nga angayang ikonsiderar.

Usa na niini ang posibilidad usab nga ang iyang amahan nga si Gerald Anthony “Didi” Sr. ang modagan isip kongresista.

Gipasabot usab ni Samsam nga dili babag ang pangidaron sa tawong buot moserbisyo tungod kay sama sa iyang manghud nga si Digul “Eduardo Gullas III” miserbisyo sa Talisay ug maoy labing batang konsehal.

Si Digul napiling first councilor sa dakbayan sa Talisay sa milabay’ng eleksiyon sa 2010 sa pangidaron nga 18-anyos.

Kung ang batan-ong Gullas modagan pagka-kongresista posibleng makaatbang niini ang anak ni kanhi gobernador Lito Osmeña nga si Mimo Osmeña ug ang mayor sa lungsod sa San Fernando nga si Antonio “Abby” Canoy.

“Whatever happens I will be strong to face it…. A neophyte is a neophyte but this is a fair game, I have a track record that some politicians don’t have. But this is about serving and if you can serve I think there is no problem,” ni Samsam pa.

Si Samsam nagkanayon nga naggikan siya sa pamilya sa mga educators ug usa sa sentro nga hatagan niya og pagtagad ang kabahin sa edukasyon ug sports kung ugaling mahatagan siya og kahigayonan sa panerbisyo.

Atol sa kalihukan kagahapon, si Samsam nanghatag og mga bitamina sa mga bata diha sa mga tunghaan sa siyudad partikular na ang mga grade one ug grade three nga gikunsiderar nga growing stage. Ang maong kalihukan ni Samsam gipahigayon matag Huwebes ug Biyernes diha sa mga tunghaan sa Talisay.  - BANAT NEWS