Lt. Gen. Dellosa nakigtagbo ni Gwen

CEBU, Philippines - Ang bag-ong natudlo   nga Chief of Staff sa Armed Forces of the Philippines (AFP) nga si Lt. Gen. Jessie Dellosa mibisita ug nakigtagbo kang Governor Gwendolyn   Garcia sa buhatan niini sa Kapitolyo sa miaging adlaw.

Si Dellosa nga maoy ika-43 na nga chief of staff sa AFP mapasalamaton kaayo sa gobernador gumikan sa dakong suporta niini ngadto sa mga sundawo nga nakapalampos sa kampanya paghimo sa lalawigan sa Sugbo nga insurgency free.

Sa ilang panagsulti gipasalig usab sa gobernador ang mapadayonong abag niini ngadto sa mga sundawo aron magpabilin ang kamalinawon sa tibuok lalawigan pinaagi sa pagtambayayong sa mga sibilyan ug sa mga sundawo ubos sa Central Command  pagpatunhay sa kahapsay ug kahusay ilabi na sa mga kahilitang mga lugar ug sa kabukiran sa Sugbo.

Gipasabot sa gobernador ang kamahinungdanon sa makanunayong kooperasyon sa military ug lokal nga kagamhanan ug mao kini ang iyang gisilsil sa alimpatakan sa mga opisyal sa kalungsoran ug kabarangayan ug sa tanang katawhan sa probinsiya sa Sugbo.

Samtang sa bahin ni Dellosa gidayeg niya ang mga maayong mithi sa gobernador hinungdan nga nadasig kaayo siya sa pagbisita sa mga sundawo    sa Central Command nga nagbase dinhi sa lalawigan.

Si Dellosa dili pa dugay natudlo sa katungdanan isip chief of staff sa AFP. Iya usab nga gipasalig sa gobernador nga ang mga sundawo magpadayon sa lig-on nga kampanya niini aron nga makig-alayon sa mga sibilyan sa pagpahigayon og kampanya aron wala nay katawhan nga mosuporta sa kalihokan sa mga rebelding komunista.  - BANAT NEWS