CEBU, Philippines - Gipasakaan na og kaso sa kapulisan kagahapon sa hapon ang unom ka mga gipasanginlang tulisan nga nadakpan niadtong Lunes sa alas-5 sa buntag nga magsakay og multicab diha sa dalan N. Bacalso Avenue sa barangay Basak San Nicolas ning dakbayan sa Sugbu.
Kasong robbery in band ang gipasaka sa kapulisan ngadto sa piskaliya batok nila ni Nelgin Briones Dacalos, Narion Carl Camomot, Mark Joseph Abellanosa, Ernesto Andog ug ang duha ka menor de edad nga lalaki ug babaye nga nagpangidaron 17 ug laing lalaking 15-anyos.
Si Insp. Rolando Pinili, hepe sa Theft and Robbery Section (TRS) sa Cebu City Police Office (CCPO) nga nahinabi sa Banat News nagkanayon nga moabot na og unom ka mga complainants ang mireklamo batok sa mga suspetsado.
Hinayhinay na usab nga narekober sa kapolisan ang mga gipangtulis sa mga suspek atol sa followup operations sa kapolisan. Ang grupo matud pang Pinili maggamitan og dulaw (yellow) nga multicab nga ilang getaway vehicle nga kuyogan og motorsiklong maoy mangita og biktima.
Ang modus mao nga ang multicab senyasan sa nagmotor nga dunay nagpadulong nga biktima ug paabuton kini sa mga nag-multicab kinsa maoy motulis sa mga biktima, lakip sa target sa grupo ang mga pasaheroan.
Sila gilambigit sa nagsunod nga pagpanulis sa dakbayan sa Mandaue, dalan Mango Avenue ug sa barangay Camputhaw ug M.J. Cuenco sa Cebu City.
Gawas sa lima ka mga suspetsado, padayon usab nga gipangita sa mga sakop sa TRS ang kauban nila nga nakaikyas sakay sa motorsiklo nga ginganlan lang og J-R ug Raymund. (BANAT NEWS)