Maestra ug pag-umangkon gitulis sa nagmotorsiklo

CEBU, Philippines - Usa ka magtutudlo   uban sa pag-umangkon niini gitulis sa duha ka tulisang de motor didto sa Consuelo Village sa barangay Basak, dakbayan sa Mandaue sa miaging gabii.

Ang gitulis mao si Rubirosa Arabes, 43, minyo nga taga Block 2, Lot 80 sa Deca Homes Subdivision sa barangay Cubacub sa maong dakbayan ug Marivic Pepito, 18, dalaga ug tinun-an sa kolehiyo nga nagpuyo usab sa maong dapit.

Si PO2 Heraclio Gamboa sa kapolisan sa Presinto 3 sa Mandaue City Police Office (MCPO) nga nagbase sa barangay Basak nga nahinabi sa Banat News miingon nga nanglakaw ang mga biktima paingon   sa highway aron mag-atang og traysikol nga ilang kasakyan pauli sa ilang balay dihang kalit lang gihunongan sa motorsiklo nga giluwanan sa duha ka wala hiilhing mga lalaki.

Ang angkas sa likod sa maong motorsiklo kalit lang mition sa iyang armas de fuego uban sa pagdeklarar og tulis dayong bunlot sa shoulder bag sa magtutudlo.

Tungod sa kabalaka nga madisgrasya siya,   ang biktima wala na magdumili sa paghatag    sa iyang bag sa kahadlok nga pusilon   siya sa mga tulisan.

Nasakiyo niini ang iyang salapi nga nagkantidad og P200, cellphone nga nagkantidad P7,000 ug mga alahas nga naglakip sa singsing nga bulawan, ariyos ug kuwentas nga bulawan nga wala na matino ang kantidad. (BANATNEWS)