Drug pusher sa Moalboal nasikop sa CIDG-7
CEBU, Philippines - Usa ka lalaki nga gisuspetsahang drug pusher nasikop sa Criminal Investigation and Detection Group (CIDG-7) didto sa lungsod sa Moalboal niadtong Miyerkules sa hapon.
Ang nadakpan mao si Christian Aquino, 21, nga taga sitio Banilad, barangay Tomonoy sa maong lungsod.
Nasakmit sa mga otoridad sa CIDG gikan sa suspetsado ang ubay-ubay nga pakete sa shabu uban sa mga armas nga walay lisensya.
Ang CIDG team nga gipangulohan ni Chief Inspector Fermin Armendarez, nagdala nang daan og search warrant nga giluwat ni Regional Trial Court (TRC) Judge Silvestre Maamo Jr.
Atol sa pagronda nasakmit sa kapolisan ang tulo ka bultong gidudahang shabu, laing tulo ka gagmay nga pakete ug mga drug paraphernalia.
Gawas sa illegal nga drugas, ang kapolisan nakakuha usab og .45 pistol ug .38 revolver sulod sa balay sa suspetsado.
Atol sa interview, si Aquino miangkon sa illegal niyang pamatigayon didto sa ilang lugar. “Pobre man gud kaayo mi sir”, matud ni Aquino.
Ang mga silingan ni Aquino giingong nalipay human masikop kini sa mga otoridad kay nagtuo sila nga wala nay mo-supply og shabu sa ilang lugar
Ang kapolisan miandam na sa tukmang kaso nga ipasaka batok kang Aquino. (BANATNEWS)
- Latest
- Trending
