Rep. Arquiza mipapanumpa sa mga opisyales sa senior citizens

CEBU, Philippines - Si Kongresista Godofredo W. Arquiza sa Coalition of Senior Citizens Associations of the Philippines, mipapanumpa sa mga opisyales sa kahupongan sa mga senior citizens, Cebu City Chapter sa miaging Pebrero 23, sa Royal Concourse ning dakbayan.

Sa kahagip-ot sa iyang schedule, si Arquiza migahin gayod og panahon nga makauban siya sa mga senior citizens ning dakbayan, diin iyang gilatid ang mga plano alang sa mga senior citizens, sama sa pagtukod og Regional Senior Citizens Center. Gihisgutan usab ni Arquiza nga ang balaudnon nga makalingkod ang mga senior citizens sa mga legislative bodies sa local government units, mipasar na sa second reading sa Lower House, ug lagmit mapasar usab kini sa Senado.

Misaad ang naila didto sa kaulohan nga “Mr. Senior Citizen” nga mogahin siyag P1-million isip assistance sa cooperative sa mga senior citizens. Ingonman, misaad usab og mga sakyanan alang sa mga senior citizens, kay matud pa, daghan nang mga chapter sa senior citizens sa ubang dapit sa nasud, ang iyang nahatagan og mga sakyanan.

Ang nanumpa, sila si Iluminado Capacite, president; Rodulfo Antig, vice president, north; Ludwig Segales, vice president, south; Rey Mojica, secretary; Flora Velez, treasurer; Lourdes Perez, auditor; Agustin Barraca, Rosalia Mialda, press relations officers; Rodelio Borres, Rosendo Vargas, sgts. at arms; Catalina Young, Josefina Sering, Consolita Solon, Angelita Cademas, George Villamor, trustees.

Ang kadagkuan sa mga senior citizens nga nanambong, naglakip kanila ni Ben Gahi, regional president sa FSCAP; Romy Martinez, OSCA Head, Talisay City; Ben Marapao, OSCA Head, Danao City; Lorenzo Abayata, FSCAP representative, Lapulapu City; Rodulfo Llaguno, OSCA Head, Cebu City; ug Jeffrey Ocampo, executive assistant to the Mayor, Cebu City.

In the meantime, paminaw ug interact sa Senior Citizens Hour sa DYRC 648 kHz matag Sabado gikan sa alas 4 sa hapon hangtud alas 6 sa gabii. (BANATNEWS)