CEBU, Philippines - Human mikombikto sa gibansagang “shabu-11” sa syudad sa Mandaue pormal nang nanumpa kagahapong adlawa isip associate justice sa Court of Appeals (CA) sa 23rd Division sa Cagayan de Oro si Presiding Judge Marilyn Lagura-Yap.
Ang pagpanumpa gihimo diha sa iyang sala diin si Associate Justice Gabriel Englis ang mipahigayon sa seremonya nga gisaksihan sa mga kaliwat ug suod nga higala ni Yap ug si Mandaue City Mayor Jonas Cortes.
Si Yap mibutyag sa mga tigbalita nga wala siya makasabot sa iyang gibati nga nahimo na siyang associate justice.
“It’s like that you’re on the crossroad and that you are about to move to another road. I’m imagining that I am on the crossroad and I am making this turn for my career,” matud pa ni Yap.
Matud pa ni Yap nga andam na siya nga makigbisog sa mga pagsuway sa bag-o niyang tahas isip bag-ong justice.
Samtang napanglantawan ni Yap nga posibling adunay ibutang nga temporaryong judge ang Korte Suprema sa Branch 28 isip hulip kaniya. Gihangop usab ni Ingles ang pagkapili ni Yap isip associate justice ug ‘deserving’ si Yap sa maong posisyon tungod sa maayong integridad ug abilidad sa babayeng huwes apan kinahanglang magpadayon kini.
Nasayran nga sulod na sa napulo ka tuig si Yap nahimong presiding judge sa Mandaue City Branch 28. Apan sa wala pa siya mahimong judge nagserbisyo usab siya isip prosecutor sa Mandaue City sulod usab sa napulo ka tuig. (BANATNEWS)