CEBU, Philippines - Gipasidunggan kagahapon sa konseho sa siyudad sa Sugbo si Assistant City Treasurer Tessie Camarillo gumikan sa dedikasyon sa iyang trabaho sa dihang milingkod pa kini isip acting treasurer sa siyudad sa miaging tuig.
Gidayeg sa konseho si Camarillo gumikan sa wala’y lipud-lipod nga pagsulti niini sa kamatuoran bahin sa estado sa panudlanan sa siyudad bahin sa gipadayag niini kaniadto nga lisud kaayo makab-ot sa siyudad ang P10 bilyones nga target budget nga giumol ni Mayor Michael Rama.
Kahinumdoman nga nagsugod ang maong isyu human ipadayag sa pipila ka mga konsehal nga dili “realistic” ang giduso nga budget ni Rama ug nakapangutana sila kung asa kuhaa ang maong budget nga naghinobra sa kadako.
Apan bisan pa sa baruganan ni Rama, si Camarillo mibarug gyud sa iyang pagtuo nga bisan unsay buhaton ni Rama maglisod pag-apas ang kagamhanan sa P10 bilyones nga budget nga iyang gustong kab-uton.
Apan si Rama sa iyang bahin hugot nga mipadayag kaniadto nga adunay mga pamaagi niini aron makab-ot ang maong budget nga naglakip sa tukmang implementasyon sa balaod sa pagkolekta og buhis gikan sa mga departamento nga adunay income generating nga mga programa.
Si Camarillo nagpasalamat sa konseho sa nadawat niya nga pasidungog ug mao kini ang labing una niyang award nga nadawat sukad sa iyang pagtrabaho sa City Hall niadtong 1998.
Giubanan si Camarillo sa iyang pamilya sa dihang gidawat niya ang award atol sa sesyon kagahapon. - BANAT NEWS