60 ka banyerang Tuloy sakmit

CEBU, Philippines - Kapin 60 ka banyera nga isdang Tuloy nga gikarga sa duha ka trak de karga ang nasakmit sa mga sakop sa Provincial Anti-Illegal Fishing Task Force-Team Eskina didto sa barangay Sabang syudad sa Danao kagahapon sa buntag.

Ang maong mga isda   gikan sa Barangay Mahawak ,lungsod sa Medellin ug giingong itumod unta kini ngadto sa barangay Pasil ning dakbayan sa Sugbo.

Apan napakyas ang mga tag-iya sa nahisgutang mga isda human kini babagi sa mga sakop sa task force kinsa nakadawat og taho kalabot sa nahisgutang kargamento nga matud pa binuthan sa dinamita.

Nasayran nga usa sa mga  trak maoy gikargahan sa 37 ka banyera   nga gibana-banang nagkantidad og kapin sa P40 mil.

Samtang ang laing sakyanan mao usay gikargahan sa laing 37 ka banyera nga gibana-bana nga mokantidad og kapin P50 mil.

Ang mga isdang nasakmit   gitakdang iapod-apod ug ipakaon sa mga binilanggo sa Cebu Provincial Detention and Rehabilitation Center (CPDRC).  - BANAT NEWS