Amang gipataopan sa icepick

CEBU, Philippines - Gitaopan sa icepick ang likod   sa usa ka amang human kini dunggaba sa wala hiilhing kriminal didto sa barangay Antogop, sa lungsod sa Asturias sa miaging kaadlawon.

Ang biktima mao si Rene Osma, 28, ulitawo, nagpuyo sa barangay Santa Rita, sa maong lungsod ug usa ka amang.

Si PO2 Manuel Gilamon sa Asturias Police Station mibutyag sa Banat News nga ang biktima naglakaw sa karsada pauli na sa ila gikang misaksi sa bayle sa Antogop.

Dihang kalit lang kining gidasmagan sa tawo nga wala hiilhi ug gihansakan ug gipaungotan sa icepick ang iyang buko-buko.

Nakadagan ang biktima nga nag-ungot ang icepick sa iyang likod ngadto sa balay sa usa ka barangay tanod kinsa mao nay miibot sa maong icepick.

Una kini ihatod ngadto sa Balamban District Hospital, gipa-blotter una ang maong hitabo didto sa Asturias Police Station.

Hinuon human sa pipila ka takna didto sa tambalanan sa Balamban, gihatod usab dayon kini ngadto sa Vicente Sotto Memorial Medical Center sa dakbayan sa Sugbo.

Gumikan kay di makasulti, naglisud ang kapolisan sa pagkuha sa hustong detalye sa maong hitabo ug pag-ila sa kriminal. (BANAT NEWS)