Gotiaco building gikoral na

CEBU, Philippines - Gisugdan na kagahapon ang pagpakoral sa Gotiaco Bldg. nga nahimutangan sa buhatan sa Cebu City Market Authority gumikan sa dakong peligro nga matumpag kini gumikan sa kagabok na sa iyang mga dapat.

Si Mayor Michael Rama maoy nagmando nga ipakoral kini aron masugdan na usab sa dili madugay ang demolisyon sa maong edipisyo.

Nasayran nga adunay kapin sa 60 ka negosyante nga nag-ukopar sa maong dapit ug gipahibawo na sa maong katuyoan busa gipadad-an na sila og notisya sa pagpabiya sa maong lugar.

Ang Department of Environment and National Resources (DENR) maoy nanag-iya sa maong luna busa ang maong ahensya maoy mo-file og hangyo aron kaluwatan kini og demolition order.

Matud pa ni Rama nga maglisod siya og tuman sa hangyo sa mga maapektohan nga negosyante nga ilibkas una ang pagpakoral.

Nagkanayon ang mayor nga tukma na ang iyang desisyon sanglit dili siya gusto nga adunay madisgrasya diin siya lang gihapon ang mabasol.

Wala pa hinuon ibutyag ni Rama kung aduna ba’y kabalhinan ang mga negosyante nga mamiya sa maong edipisyo.

Giingong karaan na kaayo ang Gotiaco Bldg hinungdan nga nangagabok na ang ubang parte niini ug gani adunay mga nangatipak niini sa labing ulahi nga linog nga miigo sa Sugbo sa miaging semana.

Si City Administrator Jose Marie Poblete mipahibalo nga usa sa ilang plano nga ang maong edipisyo kun madugmok na himoon kining parke alang sa mga senior citizen .

Ang Market Office kasamtangang mag-opisina sa nabakanteng lawak sa Taboan Public Market. (BANATNEWS)