CEBU, Philippines - Kritikal ang kahimtang sa 42 anyos nga mag-uuma human kini tigbasa sa iyang silingan nga iyang kailog sa hinatag nga bas ug graba sa National Irrigation Authority (NIA) didto sa barangay Buswang lungsod sa Asturias niadtong Domingo sa alas 8:00 sa gabii.
Ang biktima mao si Cristopher Ledisma, 42 , minyo, usa ka mag-uuma ug molupyo sa maong lugar, samtang ang suspek mao si Luis Oracay,42, minyo, ug silingan ra usab sa biktima.
Si SPO3 Dennis Nocus, imbistigador sa Asturias Police Station mibutyag sa Banat News nga ang biktima ug ang suspek nagkaaway gumikan sa ilang pag-inilogay sa sobrang bas ug graba sa NIA gikan sa proyekto sa karsada niini nga bag-ong nahuman.
Unya giingong gisung sa suspek ang biktima sa balay niini ug nanghagit og tinigbasay ug pinatyanay ug tungod kay natulog ang biktima niadtong higayona gitugon sa suspek ang pamilya niini nga magpaabot siya sa ilang puso inigka-gabii.
Busa dihang nahigmata ang biktima miadto dayon kini sa puso apan sa iyang pag-abot didto gipusil siya duha ka higayon sa suspek maayo nalang wala mobuto ang armas nga gigamit sa suspek.
Gumikan niini gilanit sa suspek ang gitakin niyang pinute ug gipanigbas ang biktima.
Gisagang sa biktima ang unang tigbas busa samdan ang iyang tuong bukton ug sa ikaduha nasabak na ang iyang ulo busa midagan kini nga nagbuhagay ang daghang dugo.
Gigukod sa suspek apan gumikan sa tambag sa mga silingan wala na tiwasi niini ang biktima.
Ang biktima daling gihatod ngadto sa Balamban District Hospital apan gi-transfer kini sa tambalanan sa dakbayan sa Sugbo.
Samtang didto na sa tambalanan ang biktima, mitahan usab ang suspek ngadto sa kapolisan dala ang 357 nga revolver ug mipasangil nga armas kini sa biktima nga gigamit sa pagpusil kaniya apan wala makabuto.
Ang suspek kinsa mikagulkol sa prisohan gitakdang ipaubos sa paraffin test aron masayran kun nagsulti ba kini sa tinuod. (/WC) (BANATNEWS)