CEBU, Philippines - Gitinguhang ipadayon ang pagpalawom sa Cansaga River sa kagamhanan sa lungsod sa Consolacion niining tuiga sa tinguha nga kapugngan ang mga pagbaha sa maong lugar sa panahon nga kusog ang pagbunok sa ulan.
Kini maoy gipadayag ni Mayor Teresa Alegado sa nahisgotang lungsod sa gihimong panagtigom nga gipahigayon sa mga sakop sa Municipal Disaster Risk Reduction and Management Council (MDRMC) nga gipahigayon niadtong miaging adlaw.
Gibutyag ni Alegado nga ang pagpalawom sa Cansaga River iyang gisugdan sa iyang pag-asumer sa katungdanan niadtong tuig 2010 ug nakita niini ang kamahinungdanon sa pagpadayon niini human sa mga nasinati nga pag-awas sa maong sapa niadtong Disyembre sa miaging tuig.
Si Municipal Engineer Carlito Maglasang maoy gitahasan sa pagpasiugda sa dredging operation ubos usab sa koordinasyon sa mga barangay opisyal nga hingtungdan sa maong lugar. Dugang pa niya nga gawas sa pagpalawom sa Cansaga River tinguha sa lungsod nga mabalhin ang mga molupyo daplin niini ngadto sa luwas nga lugar.
Sa pagkakaron gisugdan na ang imbentaryo sa gidaghanon sa maapektahang mga residente nga planong ibalhin og lugar. (BANATNEWS)