ROTC ipabalik ni Alcover

CEBU, Philippines - Hugot nga gipaluyohan ni Anad Partylist Representative Pastor Alcover Jr., ang pagbalik sa Reserve Officer Training Corp (ROTC) sa mga tulunghaan sa kolehiyo dinhi sa nasud.

Gitataw niya nga dako kaayo og ikatabang ngadto sa mga tinun-an nga nagtungha sa kolehiyo nga mapaubos sila sa maong mga pagbansaybansay.

Matud niya mao lamang kini paagi nga masilsil sa mga alimpatakan sa mga tinun-an ang pagpanalipod sa nasud sa panahon sa panginahanglan.

Gitataw niya nga nahimo na karong suliran dinhi sa nasud ang pagbaton og mga reserve military officer sukad sa paghimo niining dili na compulsory sa tanang lalaking tinun-an sa kolehiyo.

Pabor usab si Alcover sa planong rotation sa mga sundalong Amerkano dinhi sa Pilipinas samtang ang maong nasud miusab sa ilang presensya dinhi sa Asya.

“This is the most appropriate thing to do.Considering the fact that the US is an effective balancing force to maintain free use and travel along the vital shipping lanes in the West Philippine Sea that is now claimed by China,” pasabot pang Alcover. (BANATNEWS)