Agtang nasangit sa trak angkas sa motor patay

CEBU, Philippines -   Patay ang usa ka 19-anyos human masangit iyang agtang sa luyo sa trak ug naangol ang drayber sa usa ka motorsiklo dihang mibangga sila sa gi-parking nga trak de karga sa national highway sa sitio Manuong barangay Don Pedro siyudad sa Bogo niadtong Miyerkules sa alas 9:40 sa gabii.

Ang biktima nga namatay pipila ka gutlo paghiabot sa tambalanan mao si Ryan Alcalde Bayo,19, ug ang naangol ang ig-agaw niining nagmaneho nga si Michael Bayo, 31, pulos mga molupyo sa barangay Argawanon lungsod sa San Remegio.

Ang drayber sa nag-parking nga six wheeler truck mao si Freddie Munez Cabarles, 35, taga barangay Banban, Bogo City.

Matud ni SPO1 Ramonito Canja sa Bogo City Police Station dihang nahinabi sa Banat News ang mga biktima gikan sa lungsod sa San Remegio ug paingon unta sa siyudad sa Bogo.

Apan pag-abot sa maong lugar wala dayon kini makabantay sa gi-parking nga trak nga niadtong tungora giilisan og ligid sa drayber tungod kay na-flat.

Matud pa dihang nabantayan sa drayber ang de karga duol na kaayo una pa miaksyon og lihay ang motorsiklo hinungdan nga nasangit ang agtang sa angkas hinungdan sa pagkatagak niini ug tungod kay nagunit kini sa drayber nalamba ang ilang gisakyan nga motor.

Dakung paksit sa agtang ang naangkon sa angkas ug naangol usab ang drayber nga gipanghatud sa Verallo District Hospital sa Bogo apan dangtan og pipila ka gutlo namatay ang angkas samtang gibalhin sa tambalanan sa dakbayan sa Sugbo ang drayber.

Ang drayber sa trak de karga kasamtangang gi-hold sa kapulisan alang sa dugang imbestigasyon ug posibleng pagpasaka og tukmang sumbong. (BANATNEWS)